kyun nahin hote munajaton ke mani munkashif
ramz ban jata hai kyun harf-e-dua hum se suno

baqi hi kya raha hai tujhe mangne ke baad
bas ek dua mein chhut gae har dua se hum

mang lun tujh se tujhi ko ki sabhi kuchh mil jae
sau sawalon se yahi ek sawal achchha hai

meri dastaras mein hai gar qalam mujhe husn-e-fikr-o-khayal de
mujhe shahryar-e-sukhan bana aur enan-e-shahr-e-kamal de

meri shakh-e-sher rahe hari de mere sukhan ko sanobari
meri jhil mein bhi kanwal khila meri guddiyon ko bhi lal de [...]

aakhir dua karen bhi to kis muddaa ke sath
kaise zamin ki baat kahen aasman se hum

main kya karun mere qatil na chahne par bhi
tere liye mere dil se dua nikalti hai